新愛國

奇形怪狀六二三，
反中亂港受贊歎，
昔日漢奸變紅顏，
佳人伯伯合無間。


隔牆有耳：卿姐變身維園阿伯女神
2010年06月28日
自從 6.23之後，香港好似變咗另一個世界，令人感覺好陌生。例如，原來「漢奸」都可以變情人，民主黨副主席劉慧卿「卿姐」都可以取代港區全國人大代表譚惠珠「珠姐」，登上維園阿伯女神嘅寶座。
自從民主黨對政改方案投咗贊成票之後，卿姐粉絲嘅年齡層即時攀升。噚日係立法會通過政改方案後首個《城市論壇》，曾幾何時開口埋口要「殺死」劉慧卿、「槍斃」劉慧卿、拎住枴杖要敲卿姐個頭嘅維園阿伯，噚日紛紛挺身而出護紅顏，其他人唔可以蝦我卿卿咁話。
以前卿姐被鬧「瞓街卿」，上親《城巿論壇》都成為維園阿伯頭號狙擊對象，試過坐港台專車離開時被人拎住鐵通追打，被吐口水、痛罵「漢奸」之類更加係家常便飯，卿姐更試過為此向前特首董建華、保安局局長、警務處處長求助，但咁多年來情況依舊。
所謂浪子回頭金不換，何況卿本佳人？自從民主黨行咗密室談判呢條路，同阿爺行埋後，卿姐已經由維園阿伯狙擊對象變成保護對象。向來鬧卿姐鬧得最激嘅文生，噚日喺論壇上搶咪，好 man咁撐被維園阿哥狂轟嘅卿姐，話「（民主黨）做咗好正確嘅歷史決定，呢步肯定係向前行咗一步，將來嘅道路會平坦、好寬敞，你要講嘢都好容易。」
目睹呢一幕，維園阿哥馬草泥眼都凸埋，大聲話文生平日鬧民主黨最多 o架喎。但文生繼續愛屋及烏，讚埋華叔做法正確，絕對唔係癌細胞上腦咁話。
其實唔只八方對近日嘅政壇變化嘖嘖稱奇，連《大公報》關昭日前都撰文話， 6.23嗰幾日喺立法會外目睹一啲奇景，令人忍俊不禁，包括「一直惡罵『瞓街卿』的『維園阿伯』與劉慧卿握手，互道早晨，也可謂太陽從西邊出來矣」。
6.23那天，卿姐企喺「支持區議會方案」橫額前，向左派群眾發表演說，群眾高呼「起錨」，入立法會前，卿姐仲向群眾熱情揮手呢張相，八方認為必定入選 2010年最經典新聞圖片。
怨白鴿變彩鴿　岑永根擬退黨
2010年06月28日
【本報訊】民主黨支持政改方案令不少黨員失望，身為創黨成員的北區前區議員岑永根透露 7.1遊行後決定是否退黨，目前他退黨機會是「 99.9%」。
「民主黨已經變咗」
一直視已退黨的鄭家富為「恩師」的岑永根不諱言，鄭家富退黨決定對他有極大影響，認為民主黨已由白鴿變為「彩色鴿」，預料大埔區議會陸續有成員退黨。
岑永根昨向傳媒透露，除非政府撤回政改方案，否則會在 7.1後退出民主黨。身為創黨成員的他坦言懷着沉痛心情作出決定，對民主黨立場不再像往日強硬感到痛心，他指泛民就算在區議會改良方案下成功搶佔一至二席，但長遠未有解決廢除功能組別問題，「民主黨已經變咗，唔係白鴿而係彩色鴿；我多數會走。」但身為 7.1遊行糾察員的他，仍呼籲遊行人士當天不要肆意攻擊民主黨。