港無見老毛

全港最無恥，
北上無人知，
毛像成對照，
賤聯變渺小。



隔牆有耳：「民建聯最無恥」天安門展現
2010年03月08日 《蘋果日報》

兩會期間，北京保安零舍嚴密，但有高登友偏向虎山行，噚日喺討論區發表幾張相，相中人着住件「民建聯最無恥」仿二維碼 Tee，喺北京天安門城樓前留影，有兩張仲喺毛像前豎中指。呢位網民「拿拿臨係狂徒」仲留言話：「民建聯……你哋上嚟兩會乞食……我上到嚟北京……當然唔會忘記你哋嘅」。

有網民聲稱在天安門前留影，為民建聯「贈㷫」。


送花籃「贈㷫」被拒

熱烈祝賀民建聯成為 10萬人厭惡黨嘅花籃，只能擺喺英皇道。

唔少網友讚「拿拿臨係狂徒」夠勇，亦有網民話「大陸人識民建聯老鼠咩~~」「民建聯只係阿爺入面一隻馬仔都不如的小腳色，得 X閒理你」。「拿拿臨係狂徒」就話，原本冇心向毛主席舉中指，影完先知，但現場好多特警，冇得再影過。

另一位網民亦好有心，為祝賀民建聯成為 facebook上嘅 10萬人厭惡黨，日前特登買咗個花籃拎上去民建聯總部，據講當時民建聯職員即刻閂門，網民入唔到去，惟有將個花籃放喺英皇道。

送花籃網友話：「是咁的，當日我在辦公室揚言，如果真係有 10萬人厭惡民建聯，一定要送個花籃去賀賀佢，講得出，就要做得到……可惜，不能放在 15樓兼影相，只能放在大廈地下，我又唔敢強闖硬來……」

10萬人厭惡民建聯群組嘅發起人就話，正構思緊連串活動，幫民建聯「贈㷫」。